लेख्नै मन नलागेको एक समाचार


✍️ राजेन्द्रप्रसाद अधिकारी

“चुनावका घोषणापत्र र आश्वासन जस्तै

अनावश्यक र अविश्वसनीय 

आरडिटीहरुबाट निगेटिभ ठहरिंदै

परिवार र समुदायमा 

कोरोना फैलाउन 

मलाई गाउँ पस्न पटक्कै मन छैन”

***

सपनामा

एकाएक

सीमापारीबाट

आफ्नो देश छिर्न लामबद्ध

एक तर आम युवा

मेरो क्यामेरा अगाडि आएर बोल्न थाल्यो-

“नखाएको केही दिन भएको छ, तर

भोकको महशुस भएको छैन

पानी नपिएको पनि त्यति नै भयो होला, तर

पानी खाउँ जस्तो पनि लागेको छैन

मात्र यो लाम छिटो सरिदिए हुन्थ्यो, र

शरीरलाई गर्लम्म् 

आफ्नै देशको माटोमा

ढलाई दिन मन लागेको छ”

***

मैले नियालेर हेरें उसलाई

देशमा गणतन्त्र स्थापना भएपछि

मैले विपनामा सधैं देख्न थालेको

संघीय संसद

प्रदेश सभा

पालिका सभा

करोडौं मूल्यका गाडीहरु

अरबौं खर्च भएका समाचार

सफा, सुकिला र चिल्ला अनुहारहरुभन्दा

नितान्त बेग्लै

पातलो चप्पल

गोलिगाँठाभन्दा माथि नै टुङ्गिएको 

धुस्रो फुस्रो पाईन्ट, र

मैलो कमिज लगाएको 

शरीरबाट पसिनाको कडा गन्ध आईरहेको 

खल्तीमा नेपालको नागरिकता बोकेको

एक तर आम युवा बोलिरहेछ-

“म मात्र सीमाभित्र पस्न चाहन्छु 

म चाहन्न –

व्यर्थैका क्वारेन्टिन

मरेपछिका पिसिआर टेष्ट, र

मेरो नाममा अर्बौं रुपैयाँको खर्च”

***

ऊ लगातार बोल्न थाल्यो

“म चाहन्न –

व्यर्थैको गाउँसम्मको

कष्टपूर्ण यात्रा

परिवार र समुदायमा

मेरो आगमनको आतङ्क, र

अछूत लासको घाँडो बन्न

त्यसैले म चाहन्छु –

सीमा नजिकै

कुनै ठेकेदारले

एक्साभेटर लगाएर 

मेरो लागि एक चिहान खनिदिएको होस्

जहाँ म यो थाकेको शरीरलाई

गर्लम्म विसाइदिन सकुँ

जीवनबाट सदाको लागि फूर्सत लिन सकुँ”

***

गलेको र हतास 

एक तर आम युवा

सीमा पारीको लामबाट बोलिरहेकै छ

“म चाहन्छु-

मेरो व्यवस्थापनको लागि जिम्मेवार 

व्यक्ति र निकाय 

कोभिड-१९ को

प्रभावकारी व्यवस्थापन गर्न सक्षम भएको

समाचार छापियोस्, र

विश्र्वकै उत्कृष्ट व्यवस्थापन गरेकोमा प्रसंशीत रहोस् “

***

उसले यति भन्दा भन्दै

बिउँझिएको म

थाहा छैन मलाई

सपना र विपना उस्तै भएकोमा

सपना समाचार बन्न सक्छ कि सक्दैन?

सपना टेलिभिजनबाट प्रसारण हुन सक्छ कि सक्दैन? 

सपना युट्युबमा अपलोड हुन सक्छ कि सक्दैन?

जे होस् 

तर म आफ्नो धर्म निर्वाह गर्दै

लेख्नै मन नलागेको एक समाचार लेखिरहेको छु

थाहा छैन मलाई

यो समाचार बन्न सक्छ कि सक्दैन?

यो प्रतिनिधि समाचार हुन सक्छ कि सक्दैन?

प्रतिक्रिया दिनुहोस्